تنظيم الوقت فى الثانوية العامة
قبل ماتشوف الموضوع كله وتتخض من كتر الكلام أحب أقولك كل #حرف مهم جدا لحضرتك ومتكسلش تقرأ لأنه كله لمصلحتك واعرف اني تعبت في كتابة البوست ده ، وكمان ماتنسوش تعملوا اشارة لاصدقائكم وتعملوا مشاركة، خلي غيرك يستفاد ولو بشيء بسيط وانت تاخد ثواب😊
نبدأ #باسم_الله ...
حضرتك ممكن تسأل فلان عن مشكلة تنظيم الوقت يقولك على الحل الفلاني ، تسأل أستاذ كذا عن المشكلة دي يقولك اعمل كذا ، يعني وجهات النظر تختلف في حل المشاكل .. لكن هقولك على#طريقة_بسيطه_جداا ممكن تساعدك في انجاز مهامك اليومية ، لكن قبل مانقول على الطريقة خليني أقولك #معلومة عن #نفسك البشرية وهى " النفس تحب أن تتعامل معها بالمعاني وتكره الأرقام والتكليف" (لسة مش فاااهم !!) معنى الكلام ده إن نفسك البشرية لو كلفتها بكذا حاجه وألزمتها تعمل كذا وكذا وكذا فهى هتكره التكليف ده وممكن ماتعملش أي حاجه طول اليوم ، يعني على سبيل المثال خلينا في مشكلتنا دي وهى تنظيم الوقت .. لو جيت حضرتك حطيت جدول مذاكرة لنفسك يعني تقول مثلا هذاكر بلاغة من الساعه كذا للساعه كذا وهذاكر احياء من الساعه كذا للساعه كذا وهروح اعمل المشوار الفلاني في الساعه كذا وهحل امتحان كذا في الساعه كذا وهذاكر 20 صفحه ف التاريخ من كذا لكذا ، نفسك بقا أخدت كل الأوامر دي فهى كرهت ده كلها ومش هتلاقي نفسك أنجزت حاجة ، إللي عايز أقولهولك كمان إن جداول تنظيم المذاكرة والكلام ده كله طرق فاشلة ومحدش بيمشي عليها إلا من رحم ربي .. يعني ممكن تعمل جدول مذاكرة لنفسك تمشي عليه يوم ولا اتنين وبعد كده ماتمشيش عليه ، بس هقولك على الطريقة البسيطة وان شاء الله تجيب معاك فايده .. طب الحل إيه عشان نتعامل مع النفس بكل سهولة ؟ الحل إنك تتعامل معاها بالمعاني ، تراوض نفسك ..يعني ايه اتعامل معااها بالمعاني ؟؟ هقولك على مثال : إنت دلوقت هتذاكر درس #أحياء .. قبل ماتذاكر عايزك تعطي لنفسك شوية معاني عن درس الاحياء ده .. يعني هتقول لنفسك وبصوت مسموع شوية :
◘ أنا هذاكر درس الأحياء ده علشان هيجي منه سؤال في الامتحان
◘ أنا هذاكر درس الأحياء ده علشان فيه شوية معلومات هيفيدوني في المستقبل
◘ أنا هذاكر درس الأحياء ده علشان كل معلومة فيه هتوصلني لهدفي ولحلمي
◘ أنا هذاكر أحياء علشان أفهم الظواهر وأعرف الكون مااشي إزااااي
وهكذا ... تمشي على النظام ده مع كل المواضيع والدروس ، وده كان توضيح للمعلومة إللي بتقول "النفس تحب المعاني وتكره الأرقام والتكليف"
ندخل بقا على الطريقة البسيطة لحل مشكلة تنظيم الوقت .. إللي أقدر أقولهولك في الموضوع ده إن حضرتك تيجي في بداية اليوم كده بعد ماتصحى من النوم أو حتى وانت بتفطر تجيب ورقه وقلم واكتب أنت يومك محتاجه يمشى إزاى من أوله لآخره
هتكتب الحاجات المهمة إللى عايز تعملها في يومك ، خد وقتك وفكر كويس وإنت بتكتب الحاجات المطلوبه منك .. بس يعنى متاخدش اليوم كله وأنت بتفكر🙂.. طبعا هترتبهم تبع الاولويه وايه المفروض يخلص الأول ، ماتديش فرصه لأي حاجه تشتتك أو تفقد تركيزك، كل أما تخلص حاجه إعمل عليها علامه عشان تحس إنك أنجزت ، الورقة دي إللي هتكتب فيها مهامك اليومية خليها قدام عيونك دايما ، حطها في جيبك ، علقها عندك على الحيط ، حطها على المكتب بتاعك .. المهم تكون دايما قدامك عشان تفكرك بمهامك اليومية ، ذاكر ف أوقات أنت بتركز فيها كويس فى اليوم .. زى مثلا وقت الصبح بدرى أو بعد العصر، قرر إنت محتاج (بريك) فترة راحه أد ايه ما بين كل حاجه والتانية 10 دقايق مثلا أو ربع ساعه..بس بلاش ساعتين يعني 🙂..كل شويه بص للورقه وشوف إنت خلصت منها أد إيه ، دا هيحفزك جدا ، خلال اليوم كله إعطي لنفسك فتره راحه ممكن ساعتين مثلا تنام فيهم تلعب تعمل أى حاجه إنت بتحبها المهم مياخدش أكتر من ساعتين ... ده لو عندك كفاية ومش مزنوق في الوقت ،إقفل الموبايل والفيس خلال المذاكره أو اى حاجة تفقد تركيزك إلا لو محتاجه عشان تبص ع حاجه تنفعك ف المهمه المطلوبه منك ،خلى دأيما قدامك ساعه أو منبه عشان تبص دأيما ع الوقت.. إفتكر دايما إنك مش لازم ف نهاية اليوم تتوقع إنك تخلص كل حاجه بنسبه 100% لازم هتلاقي ف حاجات وقعت منك بس ع الأقل إنت خلصت 80% منها ، قبل ما تنام خد 15 دقيقه ورتب إنت هتعمل إيه بكره
نيجي بقا #للأسئلة إللي ممكن حد من حضراتكم يسألها
◙ ممكن حد يقول : طب ممكن يحصل معايا ظروف طارئة خلال اليوم والمهام تضيع وملحقش اعمل منها حاجه ؟؟
أقول سيب المهام زي ماهى مكتوبة في الورقة ونفذها في اليوم إللي بعديه وطالما ظروف طارئة يبقى قضاء الله وقدره .. هنعمل ايه ، لكن لو حضرتك بقا فضلت تلعب ومش عارف ايه ، يبقى متلومش غير نفسك يا بطل
◙ ممكن كمان حد يقول : انا باخد دروس طول اليوم وبرجع تعبان موت ويدوبك بتعشى وانام ؟؟
في الحتة دي أحب أقولك خليك #شخص_اقتصادي بمعني إنك تحافظ على كل دقيقة في وقتك وتستغلها ، يعني حضرتك ممكن تستغل وقت المواصلات وانت رايح دروسك وتذاكر فيه..هتقولي مش هعرف اذاكر ف الدوشة .. اقولك إل هتذاكره في الدوشة احسن من ال مش هتذاكره خالص، ممكن كمان تستغل أوقات انتظارك لمعاد بدء الحصة او الكورس وتذاكر فيه ، او ممكن تعمل حاجه تانية .. بعد اما ترجع مهدود حيلك وتتعشى وتنام ، اصحى على الساعه 4 الفجر كده وصلي وابدا ذاكر لحد الفطار وتبدأ تنفذ في مهامك بتاعة اليوم الحالي .. وعموما اليوم كله مش هيضيع ، لازم هتلاقي فيه وقت فاضي ان شاء الله تقدر تنجذ فيه بعض مهامك
◙ ممكن حد تاني يقول : انا عندي مهام كتير خلال اليوم وممكن ماقدرش اعملها كلها ؟؟
أقولك ده طبيعي وإللي تنفذه أحسن من إنك ماتعملش حاجه خالص ويومك يضيع على الفاضي
** ممكن حد يقول : الطريقة بتاعتك دي فاشلة ومش همشي عليها وهمشي على الجدول المذاكرة بتاعي ؟؟
أقولك حاجه جميلة خالص وربنا يقويك يا بطل واستمر
◙ حد تاني ممكن يقول : طب هو مافيش طريقة تانية لتنظيم الوقت غير الطريقة دي ؟؟
أقولك الطريقة دي من وجهة نظري طريقة سهلة وبسيطة ووجهات النظر تختلف في حل المشاكل وانا مش عالم ولا بروفيسور ، يعني هتلاقي إللي يفيدك اكتر مني في المشاكل إللي زي كده..لكن انا بحاول اساعد على حسب مقدرتي ، وفي النهاية خليك دايما فاكر حلمك وخليه دايما قدام عينك واتعب واجتهد وهتلاقي ربنا واقف جنبك علطول
........
الطريقه دي ممكن تنفع وتمشي مع معظمكم ، أما إللي مش حابب أو مش عجبته الطريقة فيبقى العيب مني انا وسامحوني .. ولو عندك سؤال بخصوص الكلام ده كله تقدر تكتبه في كومنت
وأخيرا خالص أحب أقولكم..حبوا بعض وساعدوا بعض وماتبخلوش على بعض بمعلومة لأن الله في عون العبد مادام العبد في عون أخيه ، ومحتاج رأيك هل استفدت من الكلام ده ولو بشيء بسيط وهل هتنفذ الكلام ده ياااا بطل 😄
#لعبة_الثانوية_العامة
شاهد الفيديو